Andi Europa trebal te kerelpe jekh gogjaver thaj mishtes hakeardi stratedzja savi pala kodo ka mukel e manushen te trajn barikanes, hramosarel o Bernard Rorke kotar o Open Society Instituto.
Sar dzeanelpe diplomatura thaj, donatora, manush ofisurenge, politikjara, thaj aver avile andi Cordoba po 2to Europako Romengo Kidipe thaj si akana o vahti te anas leske godzj so phendeas o Europako Komisjako Sherutno Barroso po angluno summito ando 2008. Ov phendeas ke ke kana vakearas Romane bukja “kathe naj than te mukas laissez-faire vaj te phenas ke si jekh buki savi dzeala varesar.” Numa, de atunchi, thaj tal i retorika, geleas i buki sar gdealas vi dzi akana, thaj hantzi bukja paruvdile ando dzivdipe e manushengo save si o maj baro thaj maj dukhavdo minoriteto andi Europa.
Kotar o jekto summito ko dujto, ame dikhleam amare jakhentza sar barjonas e mudarimata thaj e atakujmata ande Romenge mahale thaj ande lenge khera ande sea i Hungarja. Mursh, dzjuvlea thaj chavore sas kodola save mudarde len vaj marde len. Dikhindeam sar chache extremistura len elektoralo glasura phenindoj puterdes ke si kontra e Roma thaj barearde i dushmania e manushengi kontra e Roma.
Si o vahti kana i Europa trebal te phagel kadala dosha sar i segregatzja, ekspulzatzja, diskriminatzja thaj o biprindzaripe vash e chachimata le Romenge. Si o vahti te kerel buvlardo kadro stratedzjako ka te phagel o baro chororipe ande savo miljonura Roma trajn avdive; vahti vash jekh stratedzja savi te anel shajmatengo barabaripe, savo kerel garantzja vash o chachimos e manushengo thaj kerel lokes o drom lengo karing e servisura ka te keren maj lokes thaj maj shukar lengo dzivdipe.
Amenge trebal jekh stratedzja savi te sheol e chachimata thaj o mishtipe e Romane chavorengo maj angleder de sea so phenelpe manushesko barearipe. Ande jekh Europako thanipe savo siles phureradi populatzja, e Roma si e mai terne thaj si o maj baro demografjako kotor mashkar e populatzje. Maj but de sar so mangel i etika, amare sotzjeteta nashti te hasaren inke jekh generatzja terne Romengi mukinodoj la avreal e sotzjeteta.
Bernard Rorke si o Sherutno vash Romane Initzjative ando Open Society Institute (OSI). Kado kotor angleder dikhindilo po OSI blog.
Printable version
Email