Evropaki Unja thaj e Roma

Kotar o teleupre 10 – 12 miljonurja kotar sea e Roma so trajn andi Evropa, buteder sar dopash trajn andi Evropaki Unja (EU). EU Institutzje shute po than jekh inzardi gama instrumenturengi vash o zakono, polisje thaj financhjaro instrumenturja ka te den vast karing Romengi Integratzja  ande EU Thema Membrurja thaj karing e neve EU thema, thaj phendeas butivar vash kodo so trebal integratzja.

 

Lijndoj primeri kotar i Dekada vash Romengi Inkluzja, ando 5 Aprilje 2011, i Evropako Komisja leas upre o EU Kadro vash Themengi Stratedzja vash  Romengi Integratzja dzi ko 2020. Kado kadro akharel e Themen Membrurja te keren vaj te revizuin Themenge Romengi stratedzja  savi ka lel chaches i seama vash e problemurja vash i Romengi inkluzja ande shtar prjoriteta thema sar siklearipe, buthjaripe, kheripe thaj sastipe. O kadro si kerdo ka te avel siguro ke e thema keren Romenge spechifichne stratedzje, vaj ke e redzjonale, themenge thaj thanutne integratzjake polisje silen shuzo thaj zoralo fokuso vash e Roma. O kadro si puterdo vi karing e thema save mangen te den andre ando EU thaj vi thema Membrurja.

 

I Evropako Komisja kerel ginavipe pe stratedzje thaj del avreal lakere konkluzje andi komunikatzja Themenge Romengi Integratzja Stratedzje: o angluno dzeamos vash i implementatzja ando EU Kadro ando Majo 2012. Pala jekh bersh, i Evropaki Komisja adoptisardeas o komunikato Angle dzeamos karing i implementatzja vash Themengi Romengi Integratzja Stratedzja dikhindoj zorales vash strukturale pre-konditzje save mangen pen ka te kerelpe chaches paruvdimos vash e Roma ande EU Thema Membrurja. 

 

Sakojekh Them Membro kerdeas jekh Themesko Kontakt Punkto savo trebal te avel les o authoriteto thaj o kapachiteto te sherutnisarel o buvlearipe, i implementatzja, thaj monitorizatzja vash Themengi Romengi Integratzja Stratedzja. E Themenge Kontakt Punktja kerde kethanes jekh networko thaj maladen pen regularno ando Brusselo. 

 

I Europaki Platforma vash Romengi Inkluzja kidel kethanes themenge governurja, o EU, mashkarthemutne organizatzje, thaj Roma kotar o chivilo sochjeteo. Mangel te zorarel i buthj kerdi kethanes thaj te prindzarelpe i buthj kerdi savi andeas chaches inkluzja le Romenge thaj integratjake polisje thaj praktika.

 

Sea e vazne dokumenturja kotar EU arakhen pen po EU thaj Roma patrin.